لا تعشقي البحر ترى البحر غدار / كاملة

[color=red][i][u][strike]
قصه للكاتبه سامية المقام





(الجزء الاول )





يمة ودعني حبيب القلب يمة كان ودي من كثر شوقي اضمة



الهوا يمه من قلبي تمكن ألي خبيته يا يمة الحين بين

لما نزلت دمعة تحرق من عيوني كلهم شافوها يمة واعذروني







فتحت عيوني شوي شوي حسيت بها يالسة تقومني بصوتها الرقيق

الله ياخذ هالصوت وصاحبته ......... السراقة سرقت مني أبوية

ولا الي يقهرني مسوية عمرها بريئة وحنونة معانا .......... كرهت البيت منها ............. يا ريت بعدني في الجامعة

بدل لا أجابل هالوية النحس....... بس للاسف أنا مخلصة من ثلاث شهور ومتخرجة ولين الحين ما لقيت شغل

بس الحمدالله في شي مصبرني هو اني ليلة عرسهم دعيت أنها ما تحمل مولية ولا تيب عيال

وهي لين الحين ما حملت معنه صارلها سنة متزوجة

يا ريت هالشي يخرب علاقتها ويا أبوية ........... لاني اعرف كل الازواج الي يتاخر الحمل عندهم يصير بينهم مشاكل

لكن هالساحرة لااااااااااااااااء

ساحرة ابوية مب سهلة ويا ريت بس ابوية ساحرة الكل



سمعت صوتها:عليا قومي حبيبتي بسج كسل

عليا: أوووووووووووووف شو تبين

هزتني: الساعة عشر ما بتقومين

عليا: ليش ان شاء الله شو وراية مدرسة بروحها ........ولا جامعة بتاخر عليها

.......... ولا ريلي بي من الدوام

حسيتها انحرجت يا حليلها البريئة

قالتلي :على راحتج

وراحت

روحة بلا ردة شو تتحراني بركض وراها يعني



أوووووووووووووووووف خلاص راح الرقاد من عيني

رن مبايلي أطالعته هذي حصوه ربيعتي

حظها حلو الصراحة

عادت السنة يعني بعدها في الجامعه صح كراف بس

تتسلى على الاقل



شليت المبايل ورديت عليها



عليا:الو

حصة: لها والله بالطش والرش وينج

عليا: ويني بعد في البيت .......حصوووووه مليت

حصة: ليش بعده ما طلعلج شغل في مكان

عليا:بلا بس مب كل مكان يعيبني

حصة: بطرانة تراج خيسي عيل في البيت لين ما تلقين مكان على ذوقج

عليا: مب رايمة كارهة البيت والي فيه

حصة: عليا خلاص هذي مرت ابوج لازم ترضين بالوضع

عليا: ان شاء الله يطلقها

حصة:بس عليو غيري السالفة أدريبج الحين بطيحين فيها هالمسكينة وبتهديني

عليا: هاي مسكينه والله انتو الي مساكين

حصة:أنا ابغي أعرف شو سوتلج الحين وحليلها

عليا: كفاية صرقت أبوية منا ...وبعدين أنا ما انسى كلام ابوية لي بسبها

حصة:عليا الصراحة معاه حق

عليا: جان متصلة تغثيني صكري

حصة:خلاص بردووووووون سويتي

عليا:شو بريك عندكم الحين

حصة:هي بس الظاهر جريب بيخلص يلا عيل فمان الله بكلمج بعدين

عليا: اوكي حبيبتي باي

حصة:لحظة بتظهرين اليوم

عليا:لاء اليوم أبوية بيظهر مع المدام مالته ولازم اكون وياهم ما بخليهم روحهم

حصة:ههههههههههههههههههه الي يشوفج يقول ريلج مب أبوج

عليا:حصووووه متفيجة يلا باااااااااااااااااااي

حصة:هههههههههههه باي



فريت مبايلي حتى حصوه مصدقة أنها طيبة تعرف تقص على الكل فقتي أنا ليش ما ظهرت عليها عيل



قمت وخذت ثيابي وفوطتي وتسبحت



أول ما شغلت الرشاش ونزل الماي على راسي ما ادري ليش تذكرت الكلام الي عقه عليه ابوية وتميت أصيح صح الكلام عادي ومب جارح ذاك الزووود

بس ما ادري ليش وايد اثر فيه هالكثر تخيلوا

لين الحين مب ناستنه

هاللحظة كرهت نورة اكثر واكثر مب بس سارقة ابوية مشيشتنه علينا بعد



خلصت سبوح ولبست برمودة وقميص نص كم وردي (تراني ألبس هاللبس عادي لان ما عندي اخوان يعني مب عورة )

طلعت من الحمام ونشفت شعري ومشطه لفيته عسب لا يبلل ثيابي

وحطيت شويه لوشن على ايدي

يلست اطالع غرفتي

الي يشوف الغرفة يقول غرفة ولد مب بنت

اوووووووووف ما فيه ارتبها الصراحة وما اروم اقول حق الخدامة

لاني لو قلتها ابوية بيحتشر عليه وبيقول انتي مسؤليتج مب رايمة تتحملينها كيف باجر بتتحملين

مسؤولية ريل وعيال

الصراحة أحس من كثر ما يقولي (يوم بتتزوجين شو بتسوين)

ما عرست لين الحين والظاهر اني ما بعرس وين بيني الخير وانا اتصبح على ويه النحس هاي

وقفت جدام المنظرة اطالع عمري

الحمدالله أنا حلوة بس مب بيضة وايد يعني حنطية شوي بس شكلي بشكل عام حلو

صار عمري الحين أربع وعشرين سنة يعني بعدني صغيرة



ما أدري الصراحة ندمت اني دشيت تخصص ادارة اعمال أحس وايد متخرجين منه

عسب جي مب ملاقيه شغل

الله على ايام الجامعة والكشخة كنت ما افكر فشي غير الكشخة والخقة

كنت مرتاحة لين ما ظهرت في حياتي هالعقربة الي اسمها نورة

تنرفزت من طاريها فريت المشط على التواليت

وطلعت من غرفتي نزلت تحت شفتها تطالع برنامج عن الصغارية

ما ادري ليش تشمت فيها ................. لاحظت انها اول ما شافتني بدلت المحطة

أطالعتها باستهزا ء:شو اطالعين

نورة/:برنامج

عليا:هع هع زين زين

حسيتها ارتبكت وقامت راحت فوق الظاهر راحت تصيح لأني لمحت الدمعة في عينها .......... ضحكت ما ادري ليش استانست

يمكن لأن دعوتي استجابت وبمكن لاني ما ابغي ابوية يرتبط بها أكثر



على فكرة ابوية مب عود وايد عمره ثلاث واربعين سنة والمدام ملاته السنيوريته ثلاث وثلاثين

....... هالعانس

ما حصلت غير ابوية تتلزج فيه





شوي شفت الباب ينفتح دخلوا منه خواتي الثنتين

فاطمة وشهد

فاطمة صف سادس

شهد صف ثالث



على فكرة ترا اماية ما صارلها فترة طويلة متوفية ثلاث سنوات بس

يعني عشت معاها 21 سنة يعني صعب

مب صعب بس مستحيييييييييييييييييييييل انساها

مثل ما غيري نساها



فاطمة :وين عمو نورة

طالعتها :وانا شعرفني ليكون سكرتيرتها وانا ما ادري

شهد:ابغي أقولها شو استوالي في المدرسة

طالعتهم بعصبية وقمت من مكاني مقهورة منها يالله

كيف قدرت تكسب الكل حتى هالصغارية ما سلموا منها

رحت حجرتي وأنا انافخ من العصبية مستحيلة هالانسانة شقا ممثلة بارعة عمري ما شفت شراتها



عقيت عمري على الشبرية بس ما وحالي اصكر عيني الا الخدامة تدق الباب تزقرني على الغدا



قلتلها ما ابغي بغيض وصكرت الباب في ويها

بندت عيوني بس ما وحالي الا والباب يندق مرة ثانية جني في هالبيت مكتوبلي ما ارتاح



فتحت الباب شفت شهد تقولي: بابا يقولج تعالي غدا



فتحت عيوني لاء والله وليش مطرشنج انتي احيده روحه يي لين عندي



عليا:ليش وين بابا



شهد: أبوية تحت ويا خالو نورة



ما ادري حسيت كل العفاريت لبستني في هاللحظة

هي معلوم بي عندي لاء بيتم عند المدام ام ويهين

لكن أنا براويها هاي............

أن ما طفشتها ما اكون عليا

نزلت تحت وشفتهم كلهم يالسين على الطاولة والغدا محطوط وهم يتغدون .........لاء بعد محد يترياني

تنهدت في خاطري الله يرحم زمان أول

رحت يلست وياهم شفت نورة تاكل بنفس مفتوحة هي أكيد أبوية راضاها لكن انا براويج



حتى ابوة ما سالني ليش ما كنتي تبين غدا تراه من يشوفها ينسى الدنيا والي فيها



عليا:أبوي

:هلا حبيبي

عليا: كنت بقولك باجر العصر بروح ازور ربيعتي تعبانة شوي

:سلامتها ما تشوف شر ....روحي أبوية

عليا: تدري منو ميــــثة الي كان عرسها قبل شهرين

وشددت على شهرين وأنا أطالع نورة وهذا الي استغربه ابوية



قالي مستغرب:هي ليش

عليا:لا بس تدري ليش تعبانة

:لاء ليش شفيها

قتله وانا أطالع نورة :حــــــامل

حسيت نورة بهتت (بسم الله بتاكل ربيعتي ) لكن الظاهر انها بهتت لأن حست قصدي أني احرجها واجرحها

حسيت الدمعة في عيونها بس مب راضية تنزل

شوي ولا ابوية شرق

شفت عليا صدت صوبة :بسم الله عليك ناصر خذ اشرب عصير

ناولته عصير بس ما لحقت لأني ناولته ماي

شفت ابوية يطالع الجلاصات حيران ما يعرف يراضي منو

شل الاثنين شرب من قلاصها شوي ومن قلاصي شوي

بس حسيت بالقهر تدرون ليش

عسب شرب من قلاصها قبل قلاصي



شفتها تحاول تغير الموضوع

سألت فاطمة:شو حبيبتي فطيم شو المدرسة

لاحظت أبوية يبتسم لها بحنان واطالع فاطمة

تمت فاطمة ترمس وهم يسمعونها بعدين قالت

فطيم: تدرين عمو الابلة وايد تشبهج

نورة:ههههههههههههههههه منو أحلى عاد

فاطمة:انتي طبعاَ انا وايد احبج



عويت بوزي مب سهلة بعد مخلية البنية تحبها



ناصر: أطالع نورة وقال:طبعاَ حبيبتي تراها الحين شرات أمج

قمت بعصبية لين هني وبس

الصراحة استحملت وايد لكن هني وبس كلا ولا أمي

وقلت بصوت عالي محد ياخذ مكان امي في هالبيت لا هاي ولا غيرها



حسيت ابوية انحرج ونورة قامت وهي تتصنع الابتسامة

لاحظت ابوية يطالعني بعتاب تنهد بضيج وهز راسه وقام وراها

صديت الصوب الثاني (الحقها عن تسوي بعمرها شي مالت عليها )



شهد:ليش سويتي جي عليو



لاء ناقصني انا بعد هالياهل



طالعتهم بطرف عيني ورحت فوق غرفتي مريت حذال غرفة أبوي سمعته يقولها



ناصر:أدري حياتي أنتي مالج ذنب

الصراحة انقهرت وحسيت اذا تميت واقفة هني برتكب جريمة

رحت غرفتي وصكرت الباب بغيض



وطلع صوت قوي من الباب حسيت البيت كله سمعوه



غسلت ايدي وعقيت عمري على الشبرية



الظاهر انا ايامي كلها بتكون في حجرتي ولا على الشبرية راقدة ولا مجابلة ويه النحس نورو



غمضت عيوني وانا اتذكر المغرب أني بظهر مع أبوية والمدام مالته



لأن المدام ما تحب تظهر اخر الاسبوع اونه زحمة تظهر نص الاسبوع

براويج يا نورة أن ما نكدت عليج عيشتج



قبل كنت مشغولة بالجامعة بس الحين ما عندي شي

أنا وانتي والزمن طويل



نزلت دمعة من عيني قبل لا ارقد ما ادري دمعة قهر ولا حزن ولا عيوني تعودوا على الدموع؟؟؟؟[] " longdesc="62" />